له گه‌رمه‌ی هه‌واڵ و ده‌نگ و باسه‌کانی پێوه‌ندیدار به دانیشتنی ده‌وڵه‌تی تورکیا و پ ک ک بۆ دیتنه‌وه‌ی رێگا چاره‌یه‌کی ئاشتیانه بۆ کێشه‌ی کورد له باکوری کوردستان و له حاڵێکدا جارێ هیچ هه‌واڵێکی باوه‌ڕ پێکراو له ئه‌نجامی یه‌که‌م گفتگۆ دا له‌به‌رده‌ست دا نییه، راست له‌و کاته‌دا ده‌ستێکی ره‌شی ترۆریستی له پاریسی پێته‌ختی فه‌رانسه و له کردارێکی ناجوانمێرانه‌ی دژی به‌شه‌ریدا 3 خه‌باتکاری کورد، 3 ژنه تێکۆشه‌ری رێگای ئازادی و به‌خته‌وه‌ری گه‌لی کورد، ده‌داته به‌ر هێرشێکی نامه‌ردانه و به‌داخه‌وه هه‌رسێکیان شه‌هید ده‌کرێن. جێگای ئاماژه‌یه ئه‌و 3 که‌سه ئه‌ندام و لایه‌نگری پارتی کرێکارانی کوردستانن و یه‌کیان له ده‌سته‌ی دامه‌زرێنه‌ری پ ک ک یه.
ئه‌و کرده‌وه دژی به‌شه‌رییه له کاتێکدا دێ که زۆر که‌س و لایه‌ن به جیددی ده‌رواننه ئاکامی یه‌که‌م دانیشتنی کورده‌کان و حکوومه‌تی تورکیا که له ئیمراڵی و ده‌گه‌ڵ ئۆجالان سه‌رکرده‌ی پارتی کرێکارانی کوردستان ئه‌نجام دراون. هیچ گومان له‌وه دا نییه ئه‌و کرده‌وه هه‌ر که‌س و لایه‌نێک ئه‌نجامی دابێ ته‌نیا ئامانجی له‌بار بردنی ئه‌و دانیشتن و دیالۆگانه‌یه که لاپه‌ره‌یه‌کی تازه‌یه له مێژووی کورد و ده‌وڵه‌تی تورکیا دا. وێڕای مه‌حکووم کردنی ئه‌و ترۆره وحشیانه‌یه ئومێده‌وارم خوێنی به ناحه‌ق ڕژاوی ئه‌و سێ تێکۆشه‌ره کورده ون نه‌بێ و پۆلیسی فه‌رانسه هه‌رچی زووتر سیمای بکۆژان ئاشکرا بکات و به‌دادگای ئه‌و وڵاته‌یان بسپێرێ و جیهانیش بۆی روون بێته‌وه که کێن ئه‌وانه‌ی دژی هه‌رچه‌شنه دیالۆگ و رێککه‌وتنێکی کورد و ده‌وڵه‌تی تورکیان.
یادی شه‌هیدان له دڵدا زیندوو
نه‌فره‌ت له ترۆر و ترۆریستان
No comments:
Post a Comment