حەیدەر قوربانی کوردستانی بوو
هێشتا لە خەمی لە دەست دانی قارەمانی ئەو گەلە خۆراگر و نەبەزە نەبووینەوە هەست دەکرێ لە هەندێ لاوە خەریکی پاوان کردنی ئەو قارەمانەن بۆ خۆیان تا نەهێڵن خەڵک بە هی خۆیان و بە هی کوردستانی بزانێ ، لە حاڵێکدا ئەو خۆی بە کوردستانی دەزانی واتە خۆی بە هەموو لایەک زانیوە، بە هەردووک دێمۆکڕات وبە کۆمەڵە و بە بێلایەنشەوە.ئەگەر گوێ لە قسەکانی حەیدەر قوربانی بگری ئەو پێش ئیعدام کردنی بە ورەیەکی بەورائاسا، بە قارەمانەتێکی کەم وێنەی مەرگ بەزێن بەرەوڕووی خەونی داگیرکەران دەبێتەوە و دەڵی:
"قەسەم بە خوا ئیرادەم پۆڵایینە و یەک مسقاڵە زەڕە ترسم نیە، هەزار گیانم هەبێ ئەیکەم بە قوربانی ئەو کوردستانە، ئەو میلەتە باشەڕەفە، خۆ خوێنی من لە خوێنی سێ برای یەک بنەماڵە ڕەنگینتر نیە کە لە شەڕی دژی داعش گیانیان بەخت کرد."
ئەو قسانە قسەیەکی هاکەزایی نین، فەلسەفە وبیرکردنەوەی لە پشتە، لەباوەڕ و ئیمانێکەوە سەرچاوەی گرتووە کە بە درێژایی تەمەن کۆکراوەتەوە، ئەو لە زیندان دا ئاگای لە گیانبازی هاوخوێن و هاورەگەز و هاونیشتمانییەکەی خۆیەتی کە لەو دیوی سنووری دەسکردەوە بۆ خاتری پاراستنی خاک و نیشتمان گیان فیدا دەکەن.
حەیدەر قوربانی نەیکووت من گیانم فیدای خەڵکی کامیاران دەکەم، ئاخر ئەو ناوچەگەرا نەبوو، نەشی کوت فیدای ڕۆژهەڵاتی دەکەم چون ئەو کوردستانی بەیەک خاک و یەک نیشتمان زانیوە بۆیە دەڵێ هەزار گیانم هەبێ بە قوربانی کوردستانی دەکەم.
ئەگەر لە شەهیدی قارەمان و ڕێبەری بوێر و نەترسی کوردایەتی حەیدەر قوربانی گەڕێین و ئاوڕێک لە حاشیەو کەلێن و قوژبنی مەراسمی بە خاک سپاردنی حەیدەر قوربانی بدەینەوە ئەوە هەمان پەیام و ڕاسپاردە دەبینین.
محەمەد میرزا ڕەحمانی کەسایەتی ئایینی - نیشتمانپەروەر و یەکێک لە گوتاربێژانی مەراسمی سەرەخۆشی شەهید حەیدەر قوربانی قسە دەکا ، ئەو جگە لەوەی کە بیهەوێ بیسەلمێنێ کە ئێمە تەنیا بە هۆیە کە کوردین دەچەوسێنەوە ودەمان کوژن چی دیکە ناڵێ. زۆر بە زمانێکی ساکاریش ئەوەی سەلماند، باسی هیچ کەلێن و قوژبنێکی دیکەی نەکرد، شا بەیتی قسەکانی ئەوانە بوون، "ئێمە تەنیا چون کوردین ئەمان کوژن دەی تاوانمان چیە خوا گیان تۆ ئێمەت وەک کورد خەلق کردووە! دەنا ئێمە ئاومان هەست هەوامان هەست ..... (بە قوڵپی گریانەوە ) ئاڵامان هەس ...." دڵنیاش بن باسی ئەو خاک ونیشتمانە دەکا کە هی هەموو کوردە، باسی ئەو ئاڵا سێ رەنگە دەکات کە زۆربەی هەرەزۆری کورد بە موقەدەسترین شتی دەزانێ جگە لە چەند کەسیکی بیرتەسک کە دەیانهەوێ بە ئالا کورد لێک جودا کەنەوە!
ئەوانە پەیامێکی حەقیقین، شتێک نیە کە کەس داوای لێ کردبن وابڵێین، ئەوە ناخی زۆربەی هەرە زۆری خەڵکی ڕۆژهەڵاتە، کە وایە لە پەیامی حەیدەری قارەمانی نەتەوەییمان ولە پەیامی خەڵک و کەسایەتیەکانمان ئەو راستیەمان بۆ دەردەکەوێ کە حیزبایەتی جگە لە ناو خەڵکێکی لە قالبدراو لە ڕووی فکر و مێژووە رەنگی نەماوە و خەڵک ئیدی کوردایەتی دەکا. سەرنج ڕاکیش ئەوەیە ئەو پەیامە لە ناوەندی کوردایتیەوە نەدراوەتە دەرێ کە لە باری مێژووییەوە موکریان بەو ناوەندە ناسراوە بەڵکوو ئەوە پەیامێکی یەکجار گرینگە کە ئیتر کوردستان و کوردایەتی تەنیا لە موکریان دا خۆلاسە نابێتەوە و بەلووپۆی هاویشتووە بۆ سەرتاسەری کوردستان، هەر بۆیە ئەگەر مەهاباد پێشەوای لێ هەڵکەوتووە کامیاران حەیدەر قوربانی لێ هەڵدەکەوێ. هەردووک کەسایەتی ئایینی وهەردووک لە پێناو خاک و نەتەوە و نیشتمان ئازایانە گیانیان بەخشی. ئەوەتا لە هەموو سووچ و قوژبنێکی ئەو نیشتمانە هاوخەمی بۆ لەدەست دانی ڕۆلەیەکی بەئەمەگ و بوێر و قارەمانی کورد حەیدەر قوربانی وەک دەریا شەپۆلان دەدا، بەو هۆکارەشە کە رێژیم و بەداخەوە هەندێ کورد و حیزبیش خوڵا خوڵایانە ئەو مانگرتنەی قەرارە بکرێ سەرنەگەرێ! بۆ دەبێ وابێ؟ ئەوە چ حیکەمتێکی تێدایە؟ شتەکە ڕوونە ئەوان لە داڕمانی داڕشتی قەوارەی حیزب و بزاوی حیزبی لە ئاست بیری کوردایەتی دا نیگەرانن. لە حاڵێکدا لەجیات ئەو نیگەرانییە دەبوو ئەو هەلە زێڕێنە بقوازنەوە و بە پیر ئەو هەستەوە پاک وبێگەردەوە بچن و هەموو توانایان بخستایە گەڕ بۆ سەرخستنی مانگرتنی گشتی. کەچی لە دیواری فەیس بووکی ئەندامەکەنیشیان دا جگە لە یەک جار یادکردنەوەی حەیدەری قوربانی ئیدی چی دیکە نابینی و بەلای دا نەچوونەوە.
ئەو بابەتەم بۆ ئەوە نیە کە حاشا لە ئەندام بوونی حەیدەر قوربانی بکەم بۆ لایەنێک بەڵکوو ئەوە گەورەیی ئەو ئینسانە دەگەیەنێ کە ڕوانینی لە حیزبایەتی بەرزتر بووە و کورستانی ڕوانیوێتی خۆ لە ناو هەموو حیزبەکان دا بە کۆمەڵە دێمۆکڕاتیشەوە ئێستا خەڵکی وا گەلێک زۆرن. کە وایە مەبەستی من بیرکردنەو و ڕوانگەی خەڵکە بەگشتی و هی شەهیدی نەمر حەیدەر قوربانی بەتایبەتی.
ڕەوتی کوردایەتی لە ڕۆژهەلاتی کوردستان شەپۆلان دەدا، ئەو رەوتە و ئەو ڕوانینە بەرهەمی ٣-٤ دەیە خەبات و قوربانی دانی کۆمەڵە و دێمۆکڕات و خەبات و پاک و ... هتدە، بەڵام خەڵک گۆڕانی بەسەر داهتاتووە و هەنگاوەکانی بەرەو پێش هاویشتوون و حیزبەکان لە بیرکردنەوەی ٤٠ ساڵ لەمەوبەر جار جارە بە هەڵە ئەگەر لا دەدەن دوایە دیسان دێنەوە سەر هەمان رەوت وڕەو، ئەوان بەداخەوە بچووکترین گۆڕانیان بەسەر دانەهاتووە لەوەش خەفەتبارتر ئەوەیە کە حیزبێکی گەرەو گرانی وەک دێمۆکرات وکۆمەڵەیان پارچە پارچە کردووە و پاش ٤٠ ساڵ بێ ئەوەی بچووکترین هەستی نیشتمانی ونەتەوەیی بە واقع بیانجووڵێنێ لە جەغزی بەرتەسکی حیزبایەتی دا گیریان خواردووە و وادیارە محاڵە لێی دەربچن.
یاد وناوی قارەمانی گەل حەیدەر قوربانی لە دڵ دا زیندوو.
