تاکەی من دەبێ تاوانی هەڵە و هەڵەکاری حیزبەکەم بدەمەوە برایم جەهانگیری
لە ماوەی چەند مانگی ڕابردوو دا چەند کەسێک لە لاوانی و رووناکبیرانی ناو حدک بە هۆکاری جیا جیا لە بەرامبەر رێبەرایەتی و بەشێک لە مودریەتی ئەو حیزبەدا بە راست یان بە هەڵە هەڵوێستان گرت و حیزبیش بەداخەوە جاری یەکەم چ هەڵوێستێکی بەرامبەر بە کەسی یەکەم گرتووە بۆ دواییین کەسیش هەمان هەڵوێستی گرتووە! سەیر لەوەدایە کە هەر هەموو ئەو کەسانەی حوکمی دەرکردنیان لەسەر دراوە، هۆکار ئەمە بووە کە بە نووسین لە پرەنسیبەکانی حیزب و ئوسولی تەشکیلاتی حیزب لایان داوە.
هەموو کەس دەزانی من هەرگیز دەگەڵ ئەو هەرا نانەوە و ئەو شێوازە لە نووسینانە نیم بە تایبەتی ئەوەی کە دژایەتی دەگەڵ سیاسەتی گشتی حیزب هەبووبێ لە ڕوانگەی منەوە خەتایەکی سیاسیی گەورەیە، بەڵام لە هیچ یەک لەو کێشانە دا من لایەنگری دەرکردن لە حیزب نەبووم ونیم. هەر هێندە لە مێژ نییە لە سەر دەرکردنی هاوڕێیەکی حیزبی دەگەڵ هاوڕێیانی رێبەری هەم بە تەلەیفوون و هەمیش بە ئیمایل قسەم کردووە و نارەزایەتی خۆم لەو بارەوە پێڕاگەیاندوون. دیارە بە خۆشییەوە لە یەکیان دا هاوڕێیان رەچاوی پیشنیارەکانی من و رەنگە خەڵکی دیکەشیان کردبێ و ئەو کەسەی بڕیاری دەرکردنی درابو مەترسی دەرکرانی لەسەر نەما.
لە تازەترین دەرکردن دا بەڕێز کاک ئاسۆ خەبات لەسەر نووسینی چیرۆکێک کە لە ناو نووسینەکەی دا روونە ئاماژە بە هەندێ کەسی ناو حدک دەکات و ئیتیهامگەڵێکی ئیسپات نەکراویان لێدەدات لە حیزب دەرکرا و بەرهەمی ئەو دەرکردنەش دیسان ئەو هەرا و هەنگامەیەی لێ دروست دەبێ کە دەیبینین. لێرەدا من وەک خۆم و وەک ئەندامی حدک کە سوور دەزانم بە سەدان و هەزاران کەسی دیکەش هاودەنگمن، نە کارەکەی کاک خەبات و نە ئەو دەرکردنەی خەبات ئاسۆم لەسەر ئەو نووسینە قەبووڵە و پێم وابێ بە هەردووک لایان ستەمیکی بیداد لە حیزب بە گشتی و لەو هەموو ئەندام و لایەنگرەی دەکەن کە شەو رۆژ بەو پەڕی سەداقەتەوە خەریکی تێکۆشانن.
لەم بارەوە ئەوەی کە خەراپترین و گەورەترین هەڵە دەکات ئەو بەشە لە بەرێوەبەری یان مودیریەتی حێزبە کە بێ ئەوەی گوێ بداتە کاردانەوەی ئەو ئاکار و رەفتارانەی کە دەرحەق بە ئەندامان و لایەنگرانی لاو و جەوانی ناو حیزبەکەی دەیکات دووبارە کردنەوەی هەمان سیاسەت و رەفتاری هەڵەی رابردوویە و بێ ئەوەی دەرسێک وەرگرێ و بێ ئەوەی لایەنە ئەرینی و نەرینییەکانی ئەو رەفتارەی هەڵسەنگێنێ هەمان رەفتار و هەمان متۆد دووبارە دەبنەوە. لە حاڵێکدا سوور دەزانین کە ئەگەر ئەو خەڵکە حوکمی دەرکردنی بەسەر دا نەبڕابایە حیزبەکە گەورەتر و بە قەدر تر دەبوو و بەهانەش نەدەکەوتە دەستی چەند کەسێک کە لە خودایان دەوێ هەڵەیەکی وا بکرێ ئەوان بۆ چەند رۆژێک بە بەهانەی دلسۆزی بۆ ئازادی بەیان بیکەن بە خۆراکی تەبلیغاتی دژی حدک. ئەو بەشە لەسەرکردایەتی حیزب راست خەریکە حیزب و دەسەڵات لە حیزب دا وەک ئامرازێکی تاکە کەسی بۆ تۆڵەکردنەوە و دیفاع کردن لە خۆی بەکار دێنێ و بە راشکاوی دەڵێم لەو بڕیارانە دا هیچ گوێی نەداوەتە قازانج و بەرژەوەندیەکانی حیزب. زۆر بەروونی پرسیارم ئەوەیە کە ئەگەر کاک ئاسۆ خەبات لە سەر ئەو نووسینە لە حیزب دەرنەکرابا چ دەقەما؟ ئەو حیزبە دەروخا؟ وێران دەبوو؟ یان بە قەدرتر دەبوو.
ئازادی رادەربڕین لە حیزبدا:
ئەوەی ئەو کێشەیەی ناوەتەوە و خەڵکانێک بەهەڵە کەڵکی نابەجێی لیێوەدەگرن و رێبەریش بەهەڵەی گەورەتر ولامی پاسکاری ئەوان دەداتەوە، ئەو ئازادی رادەربڕینەیە کە لە ناو حدک دا هەبووە ، حیزبی دیمۆکراتی کوردستان یان دەبی ئەو ئەسڵە لابەرێ یان دەبی سنوور دار و دیاری بکات کە چۆن ئازادییەک دەبێ لە ناو حیزب دا هەبێ، دیارە هەتا ئازادیش سنوودار و بەرتەسکتر بکرێتەوە بایەخی ئەو ئازادییە و ئەو ئەسڵە پتر دادەبەزێ و ئەودەم ئیدی حیزبی دێمۆکراتی کوردستان ناتوانێ لەو بارەوە ئیدیعای جیاوازی دەگەڵ هیچ حیزبێکی دیکە هەبێ.
بە بڕوای من کێشەی سەرەکی لەو نیوە دا ئەوەیە کە خەڵکانێک ئامادە نین دەرکی لاوی ئەمرۆیی و خۆلیا و ئارەزووەکانی ئەو لاوانە بکەن، ئەوان دەیان هەوێ لاوی چاو کراوەی رۆژهەڵاتی وەک ساڵانی ٦٠ هەرچی فەرماندە و سەرکردە کوتی ئەوان بۆی لە ملی دەن، ئەوەش لیکدانەوە و تەوەقوعێکی نابەجێیە و راست یانی دەرک نەکردن و نەخوێندنەوەی گەنج ولاوی ئێستا. ئەوەی هەموو لایەک دەبێ بیزانین ئەوەیە کە حیزبایەتیش وەک زۆر شتی دیکە گۆڕانی بەسەر داهاتووە و دەبێ ئەو گۆڕانە هەموو ئورگان و کەس و لایەنێکی ناو حیزبەکان بگرێتەوە، ناکرێ هەموو شت گوڕابێ بەڵام لە حیزبایەتی کردن دا تۆ هەر بە شێوازی ٣٠ ساڵ لەمەوبەر حزیبایەتی بکەی! دەبێ هەموو روانگە و بۆچوونێکت لە سەر حیزبی بوون و رەفتاری حیزبی گٶرانی بەسەر دابێ دەنا ئەو قەلەتان لە ئاتەگی دەفرێ کە دەیبینین.
وتەی ئاخر:
ئەگەر حیزبەکەتان خۆش دەوێ و بۆی بە پەرۆشن با هەموو لایەک رەچاوی هەلوومەرجی ئێستا بکەین، با تەحەمولی دەنگی رەخنەگرانەی توند و تیژیشمان هەبێ ، هیچ پردی قیامەتێ ڕانابێ، با پیمان وا نەبێ هەر ئێمە دڵسۆزی حیزبین و خەڵکی دیکە نا، ئەگەر خوێندنەوەی تازەمان نییە بۆ ئەورۆ و ناتوانین لەو فەزا ئازادەی ناو حێزبدا کە خۆمانی پێوە ڕادەنێین تەحەمولی دەنگی جیاواز بکەین با ئەو دەنگە جیاوازە و ئەو رەخنەیە بێئینسافیشی تێدا بێ، باشتر وایە بەر لەوەی حیزبەکە وێران بکەن لەو پۆستە دەست هەڵگرن کە تیایدا زەرەر لە حیزب دەدەن لەجیاتی قازانجی پێبگەیەنن. ئازادی ڕادەربڕین یەکێک لە شانازیەکانی حدک ە بە هیچ جۆرێ هیچ کەس مافی بەرتەسک کردنەوەی ئەو ئازادییەی نییە، لە جیاتی ئەوەی هەوڵی بەربەست کردنی بدەن دەبێ خەڵکەکە فێر بکەن و دەبێ کەموو کوڕیەکانتان چارەسەر بکەن، تۆ بڵێی هەموو ئەو خەڵکە هەر بەهانەی هەبێ و لە حیزب بێزار بووبێ بۆیە وا دەڵی و وا دەنووسێ؟ ئایا ئاوڕێک لە خۆتان و لە کارەکانتان دەدەنەوە و پرسیارێک لە خۆتان دەکەن کە بۆچی هاوڕێی دۆێنێ و هاوسەنگەری چەند رۆژ لەمەوبەرت بەو بێزارییە لەسەرتان دەنووسێ؟ حەقیقەتی موتڵەق لای ئێوە نییە ، لەوە دڵنیا بن، ئێوە پێوستیتان بە خۆ گورێن هەیە ، ئەگەر ناتوانن واز بێنن.
No comments:
Post a Comment