نەوشیروان مستەفا
نەوشیروان مستەفا هەرگیز بەو ئامانجە نەگەیشت کە لەسەرەتای دروست بوونی کۆمەڵەی ڕەنجدەرانەوە هەوڵی بۆ دەدا، ئەویش سڕێنەوەی پارتی و بارزانی بوو لە ساحەی کوردستان. ئەگەر بە وردی بەمێژووی یەکێتی دا بچییەوە دەبینی ئەوەی پەرەی بەشەڕی براکوژی دا و ئەوەی ئیدەی شەڕی براکوژی بە هەق و ڕەوا زانی ئەوە نەوشیروان مستەفا بوو.
شەڕی براکوژی و سڕینەوەی ئەم وئەو نەک هەر پارتی ستراتیژی وتاکتیکی روون ودیاری نەوشیروان مستەفا بوو، خۆ ئەوەی ئەو دەگەڵ ئیسلامیەکان، دەگەڵ سۆسیالیستەکان، دەگەڵ پاسۆک و سەرئەنجام دەگەڵ شیوعیەکان کردی هەمووی خەراپتر بوون لەوەی دەگەڵ پارتی کردی.
نەوشیروان مستەفا کە لە شاری ڕۆشنبیری بە باوکی هەژاران ناودێر کراوە بە سەتان کوڕە هەژاری پێشمەرگەی لە حیزبە کووردستانیەکان خەڵتانی خووێن کرد. ئەو باوک و فەیلەسووف و داهێنەری ئەو رق و نەفرەتەیە کە ئیستا سەرتاپای باشووری کوردستانی داگرتووە، دیارە بەتەنێ هەرگیز ئەوەی بۆ نەدەکرا ئەگەر بەختیار عەلی و فاروق رەفیق و مەریوانی وریا قانع و بەختیار سەعید و ....سایت وماڵپەڕی وەک ئاوێنە وKNN و .... هاوکاری نەبووبان.
نەوشیروان مستەفا بەتایبەتی دوای جوێ بوونەوە لە یەکێتی و بوون بەدەسەڵاتی ڕەها لە ناو گۆڕان دا ئەو نەفرەت بەشینەوە و ژیاندنەوەی فەلسەفەی توندوتیژی و یەک بە جاش ویەک بە باش و هەولێڕچێتی و سڵێمانچێتی و بە گشتی بە دوژمنکردنی کۆمەڵگای کوردەواری دەگەڵ خۆی، دەگەڵ یەکتری تاڕادەیەک سەرکەوتوو بوو. ئەو تا ما و تا کۆتایی تەمەن ئەگەرچی لەو دواییانە دا کە زانی ئەوەی لەهەموو ژیانی داهەوڵی بۆدا بۆی ناچێتەسەر بە ئاشکرا نەیدەکرد بەڵام بە خشکە هەر پەرەی پێدەدا، ئەو بۆ دوای خۆشی خەڵکی پەروەردە کرد و کەسانی وەک هوش یار عەبدوڵای دەگیانی خەڵک بەردا. بیجگە لەو و چەند کەسێکی دیکە جێگرەوەی نەوشیروان مستەفا بۆ نەفرەت بەشینەوە لاهوور جەنگی بورهان بوو کە وادیارە ئەستێرەی بەختی بەرەو کوژانەوەیە.
ئەوەیە کە زۆر جار تووش دێی کەسێکی خۆێندەواری پلە باڵاش بە ئاشکرا دژایەتی حکوومەتی کوردی دەکات، جنێو بە ئاڵا و بە خاک و بە نیشتمان دەدا، نیشتمانی لە لا لە پێڵاوەکانی سووکترە، ئەوانە بە ئاشکرا بە بەژن وباڵای حکوومەتی بەغدا و تاران هەڵدەڵێن، پێیان لە حکوومەتی کوردی چاکترە لە حاڵێکدا حکوومەتی هەرێم بە هەموو پێوەر و پێوانەکان سەت قات لەو حکوومەتانە چاکترە و دێمۆکڕاسی وئازادیش لەو هەرێمە تا سنووری بەرەڵایی هەیە.
ئەو دەستەیە هێندەیان ڕق و کینە لە ناخی دا کۆبۆتەوە کە جێگای هیچ خۆشەویستییەک نابێتەوە، خۆشەویستی بۆ نیشتمان ڕا بگرە تا بۆ هاوڕی وهەڤاڵ و خزم وکەسی خۆشیان، لەوە خاترجەم بن کە ئەوان خۆشەویستیان بە گشتی لێ بزر بووە، دەگەڵی ئاشنا نین، ئەوان و ەها ئەو نەفرەتە چووە دەخوینیانەوە ئەگەر هیچ کەس نەما ڕقیان لێی بێتەوە ڕقیان لە خۆیان دەبێتەوە، نەفرەتیان لە ژن و منداڵەکانی خۆیان دەبێتەوە. ئەو بێڕەحمییەی ئێستا لە کوردستان لە برەو دایە ، برا برای خۆی دەکوژێ، باب کوڕی خۆی دەکوژێ، کوڕ بابی خۆی دەکوژێ، بەشێکی زاڵبووونی ئەو سایکۆلۆژیەیە کە نەوشیروان مستەفا داهێنەری بوو.
ئەوەی ئەوڕۆ لە باشووری کوردستان دەیبینن ڕێک بەرهەمی خەباتی چەندین ساڵەی نەوشیروان مستەفا و ئەو گرووپە بە ناو فەیلەسووف و مامۆستای زانکۆ و خوێندەوارەیە کە شاری رؤشنبیری و شاری هەڵمەت و قوربانی و شاری کوردو کوردایەتیان وا لێکردووە کە ئەوە دەیبینن ئێستا لە چەندین قۆڵەوە هەر یەکەو وڕقی لە ئەویترە، ڕقیان لەیەکترە. ڕقیان خۆشیانە!
No comments:
Post a Comment