پیرە هەڵۆی مەهاباد بە چۆک دانایە

پیرە هەڵۆی مەهاباد بە چۆکدانایە

دەمگرێ ئەما لە گرتووخانە رق ئەستوورترم

دەمکوژێ ئەما لەسەر داوا ڕەواکەم سوورترم
لێمدەدا ئەمما بە گژ جەلادەکەم دا دێمەوە 
کوردم وناتوێمەوە و ناتوێمەوە ناتوێمەوە. ‌"هیمن"

بۆ کۆڵنەدەر عومەری قازی

عومەری قازی یەکێک لە کۆڵنەدەرانی رێبازی قازی و قازسملوو و شەڕەفکەندی ، یەکێک لە سوارچاکانی بواری کوردایەتی، کۆڵنەدەرێکی نەسلی کۆن، پاڵەوانێکی دۆینێ و ئەمڕۆ و سبەی، ئەو تاک وتەنیا بوو بە سیمبولی مقاومەتی کوردان بەرامبەر بە ستەم و زۆرداری ئێرانی ئیسلامی، ئەگەر کاک عومەر ساڵانی زوو وەک کۆڵنەدەرێکی رێگای ئازادی، وەک پێشمەرگەیەک بەرەوڕووی دوژمنی داگیرکەر دەبۆوە، ئەمڕۆ بێچەک، بێ هیچ ئیمکانێکی تەبلیغی و بێ هیچ پشتیوانەیەکی گرووپی دیار ، بەرەوڕووی دوژمنی داگیرکەری دڵ پڕ لەقین وەستاوەتەوە، ئەگەرچی بە ڕواڵەت کێشەی دەوڵەت و دەسگا ئیتلاعاتێکانی رێژیم و عومەری قازی کەوتۆتە خانەی کێشەیەکی تایبەتی موڵک وماڵ بەڵام ئەو غەدرە و ستەمە لە کەسایەتێکی دیاری سیاسیی و کۆمەڵایەتی کورد و بەرەنگار بوونەوە و مل کەچ نەبوونی تێکۆشەرێک وکۆڵنەدەرێکی رێبازی کوردایەتی کە ئەو کێشەیە لە چوارچێوەی تەنیا داگیرکاری مڵک وماڵ و دەست بەسەرداگرتن وموسادرەدا بخوێنینەوە.

دەوڵەت و هێزە سەرکوتکەر و دەسگا ئیتلاعاتی و جاسووسیەکانی رێژیم ئامانجیان داگیرکاری مڵک وماڵ نیە ، ئەوان داخی ئەوەیان لە کاک عومەر هەڵگرتووە کە ئەو، سوجدەیان بۆ نابا، لە ئاستیان دا ناچەمێتەوە و تەسلیمی ئیرادەو خواستی ناڕەوای دەوڵەت و دادگای شۆڕش و ئیتلاعات و .... نابێت.

ئاخر رێژیم زۆر لە مێژە خەڵکێکی بەرچاو و تەنانەت دیاریشی لە رێگای جۆراوجۆرەوە دەستەمۆ کردووە، دەستی پێ لە هەموو شت هەڵگرتوون، ئەو جۆرەکەسانە لانی کەم بە ئاشکرا وازیان لە زۆر شت هێناوە، مەرحەبایی و تۆ خۆش و من خۆش دەگەڵ ئیتلاعاتی و قوڵە پاسدارەکان بە شانازی دەزانن، دەعوەت وبانگهێشتنیان دەکەن، بەڵام کاک عومەری قازی هەرگیز بە پووشی دانەناون، بەهیچی حیساب نەکردوون.. هەر ئەوەش وای لێکردوون کە هار بن، ئەوان ئاوری ئەوە بەربۆتە جەرگیان، هەر بۆیە بە بیانووی داگیرکردن مڵک و ماڵ دەیان هەوێ لەو تەمەن دا پیرەهەڵۆی موکریان و مەهاباد بە چۆک دابێنن.

بەڵێ کێشەی کاک عومەر قازی کێشەی گەلێکی بەش مەینەت و بەش خۆراوە و ئەمڕۆ لە دەلاقەی موسادیرەی مڵکی شەخسی قین لەدڵان و شەوپەرەستان دەیان هەوێ کێشەکە زەق کەنەوە. کاک عومەر قازی سوور دەیزانی توانای بەرەنگاربوونەوەی دەگەل ئەو دەوڵەتە دڕندەیە نیە و رۆژێک هەردادێ بیگرن بەرەو کونجی زیندانی ڕەوانە بکەن و لەوانەیە موڵک وماڵیشی بەزۆر زەوت بکەن، بەڵام ئەویش ئامانجێکی دیکەی هەبوو، ئەو نەی دەویست ئیرادە ودەسەڵاتی ئەوان واتە دادگای شۆڕش و دەوڵەت بسەلمێنی. ئەلحەق کە هەر ئەویش سەرکەوت، عومەر قازی تەسلیمی قانوون ویاسای پڕ لە غەدر و زۆرداری نەبوو و ئەو یاسانەشی بە هیچ دانەنا هەر بۆیە بە گوێرەی هەواڵەکان ئەمڕۆ هیزە سەرکوتکەرەکانی رێژیم دەسبەسەریان کردووە و لە تەمەنی ٨٠ ساڵیدا پیرە هەڵۆی مەهابادیان رەوانەی زیندان کردووە.

بەڵێ کاک عومەری قازی ئەی پیرە هەڵۆی مەهابادی لەبەرە بەری نەورۆز و سەرساڵی تازە دا هەم نەورۆزت پیرۆز بێ و هەمیش سەرکەوتنی ئیرادەی لە شکان نەهاتووت بەسەر ئیرادەی لەرزۆک وترسەنۆکانەی شەوپەرەستان و دەسگا ئیتلاعاتیەکانی رێژیمە فاشیستی مەسەبیەکەی ئێران دا پیرۆز.....

تێبینی: وێنەکانم لە دیواری کاک کامڕان قازی وەرگرتووە

بیرۆکەی دووئاڵا و کێ بەرکێی نێوانیان تەفرەقەیەکی مەترسیدار

بیرۆکەی دووئاڵا و کێ بەرکێی نێوانیان تەفرەقەیەکی مەترسیدار

 ئەوەی تا ئێرە لێکی نزیک کردووینەوە و لە سەری تا ڕادەیەک یەکگرتووین دووبابەتن، یەکیان نەورۆز و دووهەم ئەو ئاڵایەی دەستی چەپە، جار جارە ئەو نەغمە دەمارگراژەنەیە لە خەڵکانێک دەبیسم کە ئەو ئاڵایە دەسکاری کراوە و هی کۆماری کوردستان نییە، هی کوردی ڕۆژهەڵات نییە،  ئەگەرچی ئەو بیرۆکەیە بە مەترسی دەزانم بەڵام هەر بۆ ئەوەی نەبێتە باسێکی نەخوازراو هەمیش پێموابێ هەر لایەنێکی تایبەتی و چەند کەسێک لە ڕووی دەمارگرژییەوە یان خوێندەوەی هەڵە ئەو باسە دەوروژێنن بۆیە زۆرم گوێ نەداوەتێ لام نەبۆتە باسێکی جیدی.بڵام ورووژاندی باسی لەم چەشنە لە لایەن کەسانی خاوەن هەڵوێست و وردبین وکورد پەروەرەوە ئەو مەترسیە و نیگەرانیە دروست دەکات کە گەلۆ چما ئەو برادەرانە نابین ئێستا ئاڵاکەمان کە بناخەکەی و ناوەڕۆک و تەنانەت کاکڵەکەشی هەر هەمان ئاڵای کۆماری کوردستانە لە هەموو جیهاندا بە ئاڵای کورد دەناسرێ و رێزی لێدەگیری؟ بۆیە دەڵێم باسی ئەو دۆستانە هەڵەیە چوونکە بەشێک لەو دۆستانە دەناسم و دەزانم کەسانی خاوەن بیر وباوەڕی کوردانەن و دەمارگرژی ناوچەیی و پارچەییش کاریگەری بەسەریانەوە نییە.
 روانگەی ئەو دۆستانە بە دەمارگرژی و تەعەسوبی رۆژهەڵاتی نازانم، بەڵام بە هەڵەی مەترسیداری دەزانم بۆیە ئەو ڕۆ و یەکەم پۆستی ئەمڕۆم لەسەر ئەو بابەتەیە. من لام وایە ئەو روانگەیە مەترسیدارە  و نابێ بە هیچ جۆرێ دنەی ئەو بیرە بدەین کە جگە لە ترازاندنی زیاتری ریزی گەلی کورد هیچ قازانجێک و سوودێکی بۆ ئێمە نیە، با ئەو ئاڵا جوانە لە دەلاقەی دەمارگرژی و خوێندنەوەی هەڵەدا لای خەڵک سووک نەکەین.ئەو ئاڵایە هەر هەر هەمان ئاڵای کۆماری کوردستانە، هەموو رەمزە سەرەکیەکانی تێدایە. پێوست ناکات حەتمەن دەقاو دەق وەک هی ئەو کاتی بێ، ئالا لە هیچ کوێی دنیا وەک کتێب و دەفتەری ناساندنی نەتەوە وهەموو بیرۆکەکان ناچێ، ئاڵا سادەیە و تەنیا سێمبۆلێکی نەتەوەیی تێدایە. ئاڵای کوردستان ئەو ناوەرۆک و شکڵەی پاراستووە کە لە کۆماری کوردستان دا هەبووە،  سێمبۆلەی سەرەکیەی هەم لە ڕەنگدا و هەمیش لە ٢١ تێشکی خۆر کە گۆیا وەاتەعبیر کاروەتەوە کە نیشانەی سەرەتا و سەرهەڵدانی بەهاری جوانی و نەرۆزە، وەک مانگ بە تاقی ئاسمانەوە دەدرەوشێتەوە، بۆیە لێرەوە داوادەکەم هەموو لایەک بە چاوی کراوە و بێ تەعەسوب بیر بکەنەوە و وشیار  وئاگادار بن کە ئەوەی لە دەوری یەک کۆی کردووینەوەوتاڕادەیەک یەکی خستووین تەنیا ئەو ئاڵایە و ئاگری نەورۆزی پیرۆزە. با هەوڵی یەکڕیزی زیاتر بدەین، کورد پێویستی بە یەک ئاڵا هەیە نەک دوو و نەک چوارو نەک دەیان ئاڵای سەیروسەمەرە. بەڵێ لە دەوی ئاگری نەورۆز دڵەکانمان گەرم دەکەینەوە ئاڵای پیرۆزی کوردستان بە بەرچاوی هەموو جیهان بە بوونی نیشانەی گەلێکی سەربەخۆ و ویستی وڵاتێکی سەربەخۆ دەشەکێنینەوە. 

قسەی کۆتاییم، سەری رێز بۆ هەردووک ئاڵاکە دادەنوێنم و سوجدەیان بۆ دەبەم، ماچیان دەکەم، ئەوەی دەستی ڕاست دەچێتە مێژووی  پڕ لە شانازی گەلی کوردستان و ئەونوێیە چاوگەشەکەی دەستی چەپیش واتە ئاڵای  ئێستای کوردستان جێگای لە ناو دڵمدا بۆ هەمیشە دەکاتەوە.

قەیرانی نێوان حیزبیی کۆیە و حیزبیی هەندەران

قەیرانی نێوان حیزبیی کۆیە و حیزبیی هەندەران

ئەوا چەند ساڵە حیزب و پێشمەرگەی رۆژهەڵات لەو هەیبەت و ئازایەتییە و لەو جەربەزەیەی ساڵانی ڕابردوو دوور کەوتوونەوە، ئەوان بە هۆی ئەو وەزعە تایبەتیەی بۆ باشوور هاتۆتە پێش و حکوومەتێکی کوردی لەوێدا لە سەرکارەو ئەو حکوومەتە کوردیەش لە لایەن داگیرکەرانەوە هەر جارناجارەی قەیران لەسەر قەیرانی بۆ ساز دەبێ ناچار لە کۆیە وەک ئیدارەیەک و ئۆرگانێکی ئیداری خەریکی کاری راگەیاندن و سیاسین کە تا ئێرە لەمە زیاتر ناکرێ.
ئەوا چەند ساڵە ئەم دوور کەوتنەوە لە رۆژهەڵات وەک کرمێک بەربۆتە هیواوئاوات و ورەی شۆڕشگێرانەی هەموو ڕۆژهەڵاتیەک و هەموو خەمخۆرێکی ئەو بەشەی نیشتمانی داگیرکراوی تاساندووە، مات و سڕی کردووە. ئەو وەزعەی لە کۆیە هەیە و دیتنەوەی ڕێگایەک بۆ چارەسەری و دەرباز بوون لەو سست بوون و فیدابوونەی شۆڕش و بەرخۆدانی رۆژهەڵات لە راستی دا لە پێشدا کاری ئەو کەسانەیە کە لەوێ دەژین و ئەوان بڕیاردەری سەرەکین، چون هەر ئەوانن ئەگەر قەراربێ ئاڵووگۆڕێک لە سیاسەت و تاکتیکیان دا ڕووبدا دەبێ قۆڵ هەڵکەن و سینگیان بکەنە قەڵغانی گوللەو لەگەڵ یەکەم شریخەی هەوری بەهاری، شنەی بەرەبەیانی کوێستانە زەمەند و چیا سەرکەشەکانی کوردستان و زیندوو بوونەوەی دار و دەرخت و خاک، ڕاچلەکانی دڵەکان، شەکانەوەی پەلکی گوڵان ، بەرەو نیشتمانی بێکەسی بێدەرەتان، بەرەو نیشتمانێک کە لە نێوان بەرداشی سیاسەتی حیزبە دەسەڵاتدارەکانی باشوور و باکوور دا بۆتە کارتێکی گەمە پێکردن و هەر بۆ بەرژەوەندی حیزبی ئەوان وەک گیسکەکەی هەیاسیان لێهاتووە، تێریان دەکەن و تاوناتاوێک گورگێکیان پێشان دەدەن و دەیانهێننەوە سەر کێشی هەوڵێ... هەنگاو بنێن.

بەڵێ ئەوانن کە دەبنە پێشمەرگەو مەرگیان ڕەپێش مەرگی من وتۆ و ئەو دەکەوێ، ئەمە خوێندنەوەی واقعبینانەی دەوێ، گەمە نیە، باسی گیان و وێران بوونی ساختار و بنەمای یەک بنەماڵە و ژیان و ئەمڕۆ و داهاتووی ئەو کەسانەیە کە بڕیار دەدەن بچنەوە ناوخۆی وڵات یا نا؟

رۆژهەڵات بێ خەباتێکی هەمە لایەنە لە چەکدارییەوە بگرە تا خەباتی مەدەنی سەر شەقام، ناو کۆڕ و کۆمەڵە ئەدبی و وەرزیشی و ناو زانکۆکان نەبێ زیندوو نابێتەوە و هەر رۆژیش کە لە تەمەنی ئەو سیاسەتە تێپەرێ خەراپتر دەبین، لێک بڵاوتر دەبین و خەڵکیش وەک سەرچاوەی مان و مەوجودیەتی حیزب و شۆڕش و بەرخۆدان کەسیرە و سڕبردووی ئەو سیاسەتە شەختە لێدراوە دەبن. کێ تاوانبارە؟ ئایا تاوانێک کراوە؟ ئایا تاوانبارێک هەیە؟ ئەگەر تاوانبار هەیە با بەدوای دا بگەڕێن، خۆ من سوور دەزانم لەو بارەوە هەموو قامکەکان بەرەوی چاوی حیزبەکانە! چار چییە ؟ رێگای دەربازبوون لەم قەیرانە چییە؟ خۆ هەر ناکرێ فارس کوتەنی لە دوورەوە دانیشین و بڵێین " ئاهای... لینگش کن"! کوردیش دەڵی "ئەوەی لەمەیدان دانەبێ شێرە!" داستانی چوونەوەی ناوخۆ ئەگەر رێگاشت لێنەگرن هێندە ئاسان نییە وەک کوتم چوونەوە یانی خۆ قوربانی کردن، یانی سینگ بە گوللەوە نان. ئایا ئەو دۆستانەی سوور دەزانم لە ڕووی دڵسۆزییەوە هەمو هات وهاواریان ئەمەیە با حیزب واز لە دەشتی کۆیە بێنێ ڕوو لە ناوخۆی وڵات و نیشتمان ورۆژهەڵات بکاتەوە خۆیان ئامادەن نەک وەک پێشمەرگ بەڵکوو وەک کادر و هاوکاری دەرمانی و شتی لەو بابەتە ڕەگەڵ مەفرەزەی ێشمەرگە کەون بۆ ناو خۆی وڵات؟ ئەگەر کەسانێک هەن کە وڵامیان بەڕاشکاوی ئایە ئەوا هەقیانە هەرچی گوشار بخەنە سەر حیزبەکان کە با واز بێنن لە کۆیە و روو لە ڕۆژهەڵات بکەن، بەڵام خۆ ئەو کاتیش ئەو کارە هێندە ئاسان نییە، هەم خوێندنەەی دروستی دەوێ و هەمیش ئامادەکاری لە هەموو بارێکەوە لە پێشدا ئامادەکاری سیاسیی و سەربازی پێویستە. ئەگەرچی کورد و پێشمەرگە هەر لەمەیدانی کردەوە دا پێگەیشتوون و قارەمان و فەرماندەی زۆر ئازا و لێزانیشی لەوبارەوە هەبووە بەڵام حیزب دەبێ بە تەجرەبە وەرگرتن لە ڕابردووو، لەوشەڕانەی ئێستا لە باشوور و لە ڕژئاوا لە ئارا دایە هەرچەند فەرقی ئەو شەڕە دەگەڵ شەری بەرامبەرەکەیان لە ئێران هەبێ، خۆی و پێشمەرگە ئامادە بکات و ئەو جار ناوی خواو رەسولانی لێ بێنێ وخۆی تێبکات.

لەم ناوە دا قەیرانێک هەیە لە نێوان حیزبیەکانی کۆیە و حیزبیەکانی هەندەران، ئەوەی ڕاستی بێ خۆم هەڵناوێرم و منیش وەک ئیوە و تازە وەک مەڵای ئەو گرووپە خەڵکە هێشتا بە تەواوی لە وەزع و هەلوومەرجی حیزب ئاگادار نیم، یان نامانهەوێ هەندێ ڕاستی تاڵ ببینین.

بۆچوونی من وەک تاکە کەس ئەمەیە کە، بەداخەوە دەبێ بڵێم بوونی خەڵکێکی باش وبەکار و زەحمەتکێشی ناو بارەگاکانی کۆیەو دەوروبەر کافی نییە بۆ ورووژاندنی وزەیەکی شۆڕشگێرانە و هەلکوتانە سەر ئەو ژیانەی وەک ژیانی بنەماڵەیی شۆڕشگێرانی دێمۆکڕات، بڕستی لە زۆربەیان بڕیوە، هەر بۆیە تا ئێستاش بە تایبەتی دێمۆکڕاتەکان نەیانتوانیوە تەنانەت لە ئەدەبیاتیشدا بچووکترین کێشەی ناوخۆیان چارەسەر بکەن و هەروا لەجەغزی دەستەوشەی" هاوڕێاینی پێشوو" دا دەخولێنەوە. چوونەوە بۆناوخۆی ڕۆژهەڵاتی دیل و ئەسیر بازدانێکی شۆڕشگێرانەی دەوێ بەر لە هەموو شتێک بەسەر ئەو خوو و خدە خۆپەرەستانەی مێشکی سیاسییەکارەکانی بە خۆیەوە بەستۆتەوە. تا لەو داووبەندە ڕەها نەبن و خۆیان وێران نەکەن و سەر لە نوێ هەڵی نەشێلنەوە یان لادانی ئەو مێشکە چەقبەستوویە لە دەسەڵاتداری حیزب، چونەوە ناو خۆ و هەستانەوەی شۆڕشی ڕۆژهەڵات کاری ئەوان نییە. با هەموو شت هەر خەتای باشوور و باکووریەکانیش نەگرن، ئەگەر دێمۆکڕات و کۆمەڵە وا کوت کوت و لەت و پەت نەبووبان، ئەگەر دوای لەت بوون ئاوڕێکیان لە خۆیان دابایەوە و بۆچارەسەری کێشەکان سادقانە ملیان پێوەنابا، دڵنیام ئێستا قرمەی کەڵاشینکۆڤ و قەناسەی پێشمەرگە ڕۆژهەڵاتی دەهەژاند.